- Aytac xanım, necə oldu ki, bu sahəyə gəldiniz?

- Fizikaya marağım hələ məktəb illərindən başlayıb. Həmişə ətrafımda baş verən hadisələrin səbəbini anlamağa çalışmışam. Bu fənn mənə dünyanı dərk etmək, hadisələrin arxasında duran qanunauyğunluqları anlamaq imkanı verirdi. Bu maraq məni müəllimlik sahəsinə gətirdi. Müəllimlik, sadəcə bilik ötürmək deyil, eyni zamanda şagirdlərdə düşünmə və analiz etmə bacarıqlarını formalaşdırmaqdır. Təhsil şirkətində çalışmaq isə bu imkanları daha da genişləndirir, çünki burada innovativ yanaşmalar tətbiq etmək mümkündür. Hər zaman elmin praktiki tərəfini izah etməyi və insanlara biliyi daha əlçatan etməyi sevmişəm. Fizika isə məntiq və təcrübə ilə ən çox əlaqəsi olan fənlərdən biridir. Təhsil sahəsində işləmək və bu bilikləri yeni metodlarla ötürmək mənim üçün həmişə maraqlı olub. Təhsil şirkətində fəaliyyət göstərmək isə mənə daha geniş auditoriya ilə işləmək və müasir tədris texnologiyalarından istifadə etmək imkanı yaradır. İnsanlara elmi izah etmək, onların marağını oyatmaq mənim üçün zövqdür.

- Neçə ildir ki, bu sahədəsiniz?

- Artıq 5 ildir ki, təhsil sahəsində çalışıram və bu müddət ərzində bir çox tələbə və şagirdlərlə çalışmışam, həm də fərdi və qrup şəklində dərslər keçmişəm, onların uğurlarını görmək mənim üçün ən böyük motivasiyadır. Təhsil şirkətində işləmək isə mənə daha innovativ yanaşmalar tətbiq etməyə imkan verir.

- Öz sahəniz üzrə hansı işləri icra edirsiniz?

- Əsas işim fizikanı sadə və anlaşıqlı formada izah etməkdir. Dərslərimdə yalnız nəzəriyyə ilə kifayətlənmirəm, müxtəlif eksperimentlər və praktiki tapşırıqlarla şagirdlərin marağını artırmağa çalışıram. Bundan əlavə, olimpiadalara hazırlıq, fərdi dərslər də keçirəm. Fizika fənnini tədris etməklə yanaşı, şagirdlər üçün interaktiv dərs proqramları hazırlayıram. Eyni zamanda, STEM təhsilinə, eksperimentlərə əsaslanan öyrənmə metodlarına və beynəlxalq olimpiada hazırlıqlarına diqqət yetirirəm. Təhsil şirkətimizin məqsədi ənənəvi dərs metodlarını müasir texnologiyalarla birləşdirməkdir.

- İş prinsipiniz nədən ibarətdir?

- Dərslərimdə tələbələrə təkcə məlumat ötürmək yox, onlarda araşdırma ruhu yaratmaq əsas prinsipimdir. "Niyə?" sualına cavab tapmaq üçün düşünmək və axtarış aparmaq onların elmi inkişafına böyük təsir edir. Həmçinin, hər bir şagirdin fərdi potensialını nəzərə almağa çalışıram. Mənim üçün ən vacib prinsiplərdən biri də şagirdin dərsə marağını artırmaqdır. Fizika, sadəcə düsturlar və riyazi hesablamalar deyil – o, ətrafımızdakı dünyanı dərk etməyə kömək edir. Dərslərimdə vizual materiallardan, təcrübələrdən və interaktiv yanaşmalardan istifadə edirəm ki, mövzular daha yaxşı mənimsənsin. Şagirdlər yalnız test suallarını həll etməyi deyil, real həyatda Fizikanı görməyi və tətbiq etməyi öyrənməlidirlər.

- Bir mütəxəssis olaraq nəyi "yox" deyirsiniz?

- Əzbərləmə üsulu ilə öyrənməyə və yalnız imtahana yönəlmiş dərslərə "yox" deyirəm. Şagirdlərə problemi həqiqətən başa düşmək və onu real həyatda tətbiq etməyi öyrətmək daha vacibdir. Eyni zamanda, köhnəlmiş tədris metodlarından uzaq durmağa çalışıram. Fizikanın çətin və yalnız müəyyən insanlar üçün olduğunu düşünənlərlə də razılaşmıram. Hər kəs düzgün yanaşma və maraqla bu fənni öyrənə bilər. Şagirdlər bir formulun nə üçün istifadə edildiyini başa düşməlidir, əks halda bu, qısa müddətli yaddaşda qalacaq və real bilik olmayacaq.

- Son zamanlarda sizə daha çox nə ilə bağlı müraciətlər olur?

- Son vaxtlar valideynlər və şagirdlər onlayn tədris metodları, beynəlxalq olimpiada hazırlıqları və STEM təhsili ilə bağlı daha çox suallar verirlər. İnsanlar artıq daha praktiki və tətbiqi biliklərə üstünlük verirlər, bu da təhsil şirkətimizin strategiyasına tam uyğundur. Eyni zamanda, valideynlər də uşaqlarının bu sahəyə marağını artırmaq üçün məsləhətlər alırlar.

-Xarakter olaraq necə birisiniz?

- Yeniliklərə açıq, səbirli və daim öyrənməyə maraqlı bir insanam. Təhsil daim inkişaf edən bir sahədir və burada uğurlu olmaq üçün öyrətməklə yanaşı, özün də davamlı şəkildə öyrənməlisən. Həmçinin, tədrisdə yaradıcılığa üstünlük verirəm, çünki standart metodlar hər zaman effektli olmur.

- Oxuculara nə məsləhət görürsünüz?

- Öyrənməkdən heç vaxt çəkinməyin və sual verməkdən qorxmayın! Müasir dövrdə məlumat almaq çox asandır, amma əsas məsələ doğru məlumatı tapmaq və onu praktik şəkildə istifadə edə bilməkdir. Elm və texnologiya daim inkişaf edir, ona görə də daim yeniliklərə açıq olun. Əgər bir şeyi başa düşmək çətindirsə, onu başqa prizmadan dərk etməyə çalışın. Suallar vermək və araşdırmaq sizi hər zaman bir addım irəli aparacaq.

- Mən bu sahəyə gələrkən, ağlıma gəlməzdi ki,.. Bu fikri özünüz tamamlayin, zəhmət olmasa.

- Şagirdlərimdən bu qədər şey öyrənəcəyəm! Düşünürdüm ki, yalnız mən onlara öyrədəcəyəm, amma əslində qarşılıqlı öyrənmə prosesi gedir. Onların baxış bucağı, sualları və maraqları mənə də yeni ideyalar verir. Həmçinin təhsildə texnologiyanın bu qədər mühüm rol oynayacağını düşünməzdim. Əvvəllər fizikanı sadəcə lövhə və kitablarla öyrətmək adi hal idi, amma bu gün animasiyalar, simulyasiyalar, virtual laboratoriyalar və interaktiv dərslər vasitəsilə çox daha effektiv tədris aparmaq mümkündür. Bu, mənim üçün inanılmaz dərəcədə maraqlıdır və motivasiya verir.

Əlaqə nömrəsi: (070) 660 58 43скачать dle 10.6фильмы бесплатно